رسالة من شاب لحبيبته!

"اللي مالوش خير ف اهله مالوش خير ف حد ،

*وبسبب المقولة دي كان لازم اسمع كلام الست الوالدة ،

لما إختارت ليا عروسة وعاوزة اني اسيب البنت اللي بحبها من كل قلبي وكنت بتمناها تكون مراتي طول فترة الجامعة.

* بصراحة الحاجة كانت مرشحة ليا عروسة ماشاء الله جميلة ومؤدبة وست بيت شاطرة ، حاجة كده ماتتسبش البنت مفيش فيها غلطة واحدة.

*وبتعرف تطبخ كويس جداا وقاعدة قدام قناة سي بي سي سفرة 24 ساعة ويقال ان الشيف بوراك مثلها الاعلي ، وامي وشوشتني كده ف ودني واحنا في زيارة عندهم وقالتلي انها بتعرف ترقص ولا صافينار ياواد ..

*في الحقيقة هي عروسة متتعوضش ومفيش واحد عنده عقل مايوفقش على واحدة بالمواصفات دي ، والا يكون مجنون لا مؤاخذة ف الكلمة .

*بس يا خسارة العروسة دي فيها كل حاجه جميلة بس مش (إنتي) ، مش نكدية زيك وكلها عبط وبتاكل كتير جداا ، انا اتعودت علي صوت الطاسة الساعة اتنين بليل وانتي بتكلميني في الفون وانتي بتحمري البطاطس..

*وكم مرة قولتلك عقبال ما ابقي انا وانتي و الطاسة في مطبخ واحد يا جميل انت يا قمحاوي ..

*تعالي هنا مين قالك اننا عاوز عروسة مفيش فيها عيوب ، انا عاوز واحدة مليانة عيوب بس بموت فيها ، عاوز واحده في هبلك بتاخد ماية الرز عشان تتقل شعرها بيها ..

*عاوز واحدة أنا وهي نقعد في البلكونة المغرب كدا وهي حطة علي وشها كل برطمان البن اللي لسه جايبه من يومين واقولها (حسبي الله ونعم الوكيل).

*واحده بتقولي نكت بايخة عشان بس تشوف علي وشي رد فعل "أحمد الخولي" واسيبها واقوم تيجي ورايا وتتعلق ف رقابتي وتبوس فيا .

*واحده فاهم تفكيرها وواثق فيها وف قلبها اللي مستحيل شئ تاني يشاركني فيه .. واحده عارف تاريخ ميلادها كويس وامثل عليها ان نسيته ، ومجبتش هدية لحد ما تعيط من استعباطي وبعدين افاجئها أن مش ناسي ولا حاجة ..

*وبعدين انا لو سيبتك مين هيعدي بيكي الطريق والعربيات جاية بسرعة ، ومين هيجبلك زهرة عباد الشمس اللي بتحبيها .

*هو فعلا اللي مالوش خير ف اهله مالوش خير ف حد ، بس انا مش موافق علي مائة واحده احسن منك ممكن اهلي يختاروها ليا ..

* انا بقولهالك أهوو في العلن ، انا مش هتجوز غيرك ولسه قافل مع ابوكي وهروح بكره اطلب ايدك وعينك ومشاعرك منه ..

Groyed _ جرويد

القائمة الرئيسية

الصفحات

رسالة من شاب لحبيبته!